Samfélagið
Sjálfbærni
Sjálfbær þróun er þróun sem mætir þörfum nútímans án þess að skerða möguleika komandi kynslóða á að mæta þörfum sínum. Slík þróun snýst um að auka efnahagsleg verðmæti um leið og gæðum náttúrunnar er viðhaldið og mannréttindi efld fyrir alla jarðarbúa til langs tíma. Markmið sjálfbærrar þróunar er að koma á sjálfbærni í samfélaginu í heild og á jörðinni.
BYKO tók ákvörðun að móta stefnu í sjálfbærni og er forstjóri ábyrgur fyrir sjálfbærnistefnu BYKO. Kröfur og markmið eru í sífelldri þróun og skal stefna þessi og markmið hennar vera yfirfarin árlega. Framkvæmdastjórar bera ábyrgð á sjálfbærnistefnu fyrirtækisins í daglegum rekstri og skulu setja markmið fyrir hverja einingu sem stuðla að því að ná settum markmiðum. Allir starfsmenn BYKO fá fræðslu sem gerir þeim kleift að skilja áhrif starfa þeirra á sjálfbærnimarkmið fyrirtækisins.
BYKO horfir á þrjár stoðir sjálfbærninnar sem kallast UFS sem stendur fyrir umhverfisþætti, félagslega þætti og stjórnarhætti (e. Environmental, Social and Governance (ESG)). Það eru viðmið sem fyrirtæki gætir að umhverfislegum áhrifum starfsemi sinnar (U), hvernig fyrirtækið kemur fram við starfsfólk sitt, birgja, viðskiptavini og samfélagið sem það starfar í (F), og viðmið um stjórnarhætti, t.d. fjölbreytni og fyrirkomulag stjórnar, mútuþægni og spillingu.
BYKO hefur unnið markvisst að sjálfbærni síðustu árin og talað fyrir sjálfbærnivegferð BYKO, eigin ábyrgð á innra starfi sem og fræðslu um vistvæn byggingarefni og vistvottunarkerfi, en með því náum við að hafa áhrif á byggingariðnaðinn að byggja vistvænni mannvirki, bæði í þágu umhverfis, mannfólks og rekstarhagkvæmni til framtíðar.
Sjálfbærnistefna
Byggingar eru ábyrgar fyrir um 40% af orkunotkun og losun gróðurhúsalofttegunda á heimsvísu og getur byggingarmarkaðurinn aukið sjálfbærni og dregið úr loftlagsáhrifum með aðgerðum. Hann getur lágmarkað kolefnisspor mannvirkja með því að velja byggingarefni með lágt kolefnisspor og BYKO er þar með hluti af virðiskeðjunni að geta boðið markaðnum upp á vistvæn byggingarefni og stuðlað að betri framtíð.
BYKO hefur sett sér heildstæða sjálfbærnistefnu byggða á þeim heimsmarkmiðum Sameinuðu þjóðanna sem fyrirtækið vinnur að. BYKO mun leggja áherslu á sjálfbærni sem tekur á umhverfis- félagslegum- og efnahagsmálum.
Sjálfbærnistefnu BYKO má skoða í heild sinni
hér
Umhverfislegir þættir
- Loftlagsbreytingar
- Gróðurhúsalofttegundir
- Úrgangsmál
- Hringrásarhagkerfi
- Binding kolefnis í eigin skógi
Félagslegir þættir
- Tryggja vellíðan fólks og öruggt og heilbrigt umhverfi
- Vistvæn sjónarmið í eigin byggingum og auka þar með lífsgæði þeirra sem þar fara um
- Mannréttindi, vinnuskilyrði
- Fjölbreytileiki
Stjórnarhættir
- Stjórnskipulag
- Mútuþægni og spilling
- Ábyrg innkaup og aðfangakeðja
- Viðskiptasiðferði og heilbrigðir viðskiptahættir
- Siðareglur
Umhverfislegir þættir
Vistvæn saman
BYKO hefur töluverð umhverfisáhrif í sinni eigin starfsemi. Mest eru umhverfisáhrifin þó í gegnum þær vörur eða þjónustu sem fyrirtækið býður upp á. Fyrirtækinu ber því skylda að leggja áherslu á vöruframboðið ekki síður en eigin starfsemi. Umhverfisstefna BYKO hefur þrjú meginþemu, vistvænt vöruframboð, fræðslu til viðskiptavina og innra starf.
Umhverfisstefnuna er að finna á heimasíðu BYKO ásamt ýmis konar fræðslu um vistvæn byggingarefni og vöruframboð BYKO á þeim, þýðingu umhverfismerkja, upplýsingar um vottunarkerfin BREEAM og Svaninn og upplýsingar um vottað timbur. Við skilgreiningu á vistvænu vöruframboði BYKO komu upp ákveðin álitamál sem snerta rétta upplýsingagjöf til viðskiptavina. Það er hluti af skyldu okkar að fræða viðskiptavini um umhverfismál, sú fræðsla verður samtímis að vera rétt og hlutlaus. Álitamálin fjalla annars vegar um það hvernig hægt er að segja að vara sé leyfileg í Svansvottað hús án þess að varan sé sjálf Svansvottuð og hins vegar hvort og þá hvernig skuli vinna með rekjanleika svo hægt er að staðfesta að timbur komi frá sjálfbærri skógrækt.
Umhverfisstefnu BYKO má skoða í heild sinni hér
Vistvænar vörur og vistvottunarkerfi má skoða hér
Félagslegir þættir
Mannauðurinn er mikilvægasti þáttur fyrirtækja sem vilja ná árangri. BYKO vill hafa besta starfsfólkið og búa til bestu mögulegu aðstæður fyrir starfsfólk.
Hjá BYKO er lagt áhersla á einstaklingsmiðaða nálgun á starfsþróun og fræðslu þar sem starfsfólk er allt með ólíkar áherslur og þarfir. Með þessari mannauðsstefnu ætlar BYKO að stuðla að því að besta heildarupplifunina við að vinna hjá BYKO. Lykillinn að því að fá gott starfsfólk til starfa er að hafa gott orðspor og sterka ímynd. BYKO er eitt virtasta og þekktasta vörumerki á Íslandi og með því að vera með virka mannauðsstefnu stuðlar BYKO að því að viðhalda þessari ímynd bæði sem vörumerki og vinnustaður.
Mannauðsstefna BYKO er samansett úr þremur stefnum
Jafnlaunastefna
Var vottuð á árinu 2022.
Byggt á jafnlaunastefnunni er aðgerðaráætlun í jafnréttismálum í samræmi við lög um jafna stöðu og jafnan rétt kvenna og karla.
Starfsmannastefna
Byggir á þeim meginþáttum sem snúa að ánægju, starfsþróun, þjálfun, jafnrétti og faglegri stjórnun.
Stjórnarhættir
Nýta skal fjármagn með sem hagkvæmustum hætti og verklag innan félagsins einkennist af góðu viðskiptasiðferði, heilbrigðum viðskiptaháttum og ábyrgð.
Eldri skýrslur má finna hér
Samfélagsþátttaka
Heimsmarkmið sameinuðu þjóðanna
BYKO skilgreindi árið 2019 fimm kjarnamarkmið og hóf innleiðingu á árinu 2020. Upphaf innleiðingar fólst í því að fræða starfsfólk um öll 17 heimsmarkmiðin og hvað þau þýða. Farið var ítarlegra í þau markmið sem BYKO hafði skilgreint sem kjarnamarkmið og ástæðuna fyrir því af hverju þau markmið voru valin frekar en önnur. Árið 2021 fólst að mestu í að fá tilfinningu fyrir því hvernig hægt væri að máta sig inn í markmiðin út frá verkefnum, hegðun og finna þau tækifæri sem betur mátti nýta. Það sem skiptir okkur máli er að geta haldið umræðunni á lofti og hjálpað hvort öðru í að átta okkur á mikilvægi markmiðanna.
Árið 2022 var farið í ítarlegri fræðslu til starfsfólks og kjarnamarkmiðunum komið í ábyrgð hverrar deildar. Þetta var framkvæmt með námskeiðum þar sem fulltrúar frá hverju sviði/deild komu saman til að auka skilning og voru markmiðin sett í ábyrgð þeirra þar sem þau eiga fóstra þau, láta þau vaxa og dafna.
Árið 2023 verður svo tekið næsta skref í innleiðingunni þar sem hópurinn mun hittast, draga fram lærdóm og yfirfara hvaða breytingar hafa átt sér stað á síðustu 6-12 mánuðum.
Kjarnamarkmið BYKO
BYKO setur sér mælanleg og tímasett markmið á kjarnamarkmiðum út frá heimsmarkmiðum og áskorunum á Íslandi.
Röksemdir fyrir vali á þessum kjarnamarkmiðum og undirmarkmiðum má finna
hér
BYKO vinnur að öðrum heimsmarkmiðum samhliða kjarnamarkmiðum eins og markmið númer 13, aðgerðir í loftlagsmálum og markmið númer 3, heilsa og vellíðan. Ástæðan fyrir því að þessi markmið eru ekki kjarnamarkmið er að meiri þunga þarf að leggja í kjarnamarkmiðin og þykir eðlilegra að velja ekki of mörg þótt önnur séu mjög mikilvæg og unnið að þeim daglega í rekstrinum.
UN Women
BYKO styrkti verkefni UN Women í Úkraínu á árinu vegna stríðsástandsins á móti viðskiptavinum BYKO sem gafst færi á að bæta við upphæð við heildarupphæð í sínum kaupum. Fjárhæðin sem safnaðist rann til verkefna UN Women í Úkraínu, sem voru fjölmörg og ólík.
Í austurhluta Úkraínu, þar sem átökin hafa verið hvað hörðust, lá mest á lífsnauðsynlegri neyðaraðstoð. Í vestur Úkraínu snerust verkefni UN Women að því að tryggja konum á flótta húsnæði, heilbrigðisþjónustu, lagalega þjónustu og fjárhagslegan stuðning. Þá styður UN Women í Úkraínu við ýmis félagasamtök, þ.m.t. kvennaathvörf, gistiskýli fyrir heimilislausar konur, úrræði fyrir konur í vændi og athvörf fyrir Róma fólk á flótta, en fordómar hamla því oft að þau hljóti skjól og aðstoð.
Félagasamtök
BYKO er aðili að eftirfarandi félagasamtökum;
Hagsmunaaðilar
Hagsmunaaðilum BYKO má skipta í tvennt, innri og ytri hagsmunaaðila. BYKO gerir ekki sérstaka hagsmunaaðilagreiningu á forsendum samfélagsábyrgðar. Fyrirtækið lætur aftur á móti gera viðhorfskannanir meðal viðskiptavina, starfsmanna og almennings á ýmsum atriðum sem snerta starfsemi fyrirtækisins.
Áherslur BYKO varðandi hagsmunaaðila
- Að gera vöruframboð BYKO vistvænna, þannig að vörurnar verði leyfilegar í umhverfisvottuð hús byggð samkvæmt norræna umhverfismerkinu Svaninum, vistvottunarkerfinu BREEAM og vistvottunarkerfinu LEED
- Kynna vistvænar byggingaraðferðir fyrir fagfólki svo sem hönnuðum, arkitektum, verkfræðingum, verktökum, iðnaðarmönnum, ákvörðunartökuaðilum og menntastofnunum
- Samstarf við birgja að skoða hvort núverandi vöruframboð þeirra uppfylli kröfur til að vera notaðar í Svansvottuð hús, vistvottunarkerfið BREEAM og vistvottunarkerfið LEED
- Að starfsfólk BYKO sæki námskeið til að afla sér réttinda til að auka fagþekkingu
Fræðslan hefur verið framkvæmd í gegnum námskeið hjá skólum, opnum fyrirlestrum, verktakafundum og samstarfsverkefnum með birgjum. Framkvæmdastjórar BYKO, vöruflokkastjórar og sölumenn á fyrirtækjasviði ásamt utanaðkomandi ráðgjafa unnu að greiningu hagsmunaaðila. Til að meta mikilvæg viðfangsefni var horft til kannana sem fyrirtækið lætur framkvæma meðal viðskiptavina annars vegar og starfsmanna hins vegar.
Athugasemdir starfsmanna sem og viðskiptavina koma áleiðis í gegnum ráðstefnur, fyrirlestra, námskeið, með tölvupósti og í gegnum starfsfólk í verslunum. BYKO er orðið sýnilegra og virkari á markaðnum er varðar sjálfbærniaðgerðir.
Starfsmaður framþróunarsviðs BYKO sótti BREEAM námskeið árið 2021 til að afla sér réttinda sem BREEAM Associate og LEED námskeið árið 2022 sem LEED Green Associate og getur þar af leiðandi veitt faglega ráðgjöf til þeirra viðskiptavina sem hyggjast á vottun á byggingarframkvæmd.
Sjónarmið viðskiptavina og starfsmanna endurspeglast meðal annars í efnistökum þessarar skýrslu. Mikilvægi viðfangsefna skýrslunnar má skipta í tvennt;
- Samfélagsáhrif (fjárhagsleg, umhverfisleg og félagsleg) í innra starfi BYKO
- Hvernig BYKO getur auðveldað viðskiptavinum og öðrum hagsmunaaðilum í samfélaginu að tileinka sér vistvænar byggingaaðferðir.
Viðfangsefnin tengjast einnig heimsmarkmiðunum sem BYKO leggur áherslu á og er því betur lýst í kaflanum um heimsmarkmið Sameinuðu þjóðanna, sjá nánar
hér.
Helstu hagaðilar í vistvænni mannvirkjagerð
Þátttaka í nýsköpun
BYKO hefur tekið þátt árlega í nýsköpunarverkefnum, bæði til að styðja við bakið á frumkvöðlum og ekki síður til að skapa og miðla þekkingu út á markaðinn til að hafa áhrif til betri vegar.
Þau verkefni sem BYKO tók þátt í á árinu;
Hönnunarstofan Plastplan
Hringrás plastefna með því að taka það plast sem fellur til í BYKO og þróa og framleiða úr því ný og falleg verk. Á árinu 2022 var fyrsta varan framleidd, þúsund stykki af blómapottum merktir 60 ára afmæli BYKO, en þeir voru kynntir á afmælishátíð BYKO þar sem fræðsla um hringrásarhagkerfið fór fram og viðskiptavinir gróðursettu blóm í pottinn og fengu að taka með sér heim.
Arkís arkitektar
Farið var í samstarf við Arkís arkitekta um Svansvottaðar endurbætur á gömlu atvinnuhúsnæði á Kársnesinu, þeim framkvæmdum lauk á árinu 2022. BYKO var samstarfsaðili verkefnisins og var hlutverk okkar að veita ráðgjöf við efnisval á vistvænum byggingarefnum. Gluggar komu frá BYKO LAT sem eru leyfilegir í Svansvottuð hús en BYKO hefur framleitt glugga í yfir 30 ár sem eru sérhannaðar fyrir íslenskar aðstæður.
Visthönnun
Árið 2020 hófst samstarf við Visthönnun sem reisir Svansvottað einbýlishús í Hafnarfirði, það hús er byggt úr CLT einingum og rík áhersla lögð á að sem mest af efninu sé vottað, áætlað er að því verkefni ljúki á árinu 2023. Hlutverk BYKO er að veita faglega ráðgjöf við vistvæn byggingarefni.
Mannauður
Við hjá BYKO trúum við því að starfsfólkið okkar sé okkar mikilvægasta auðlind til að ná árangri. Því hefur félagið sett sér þá framtíðarsýn að skapa bestu heildarupplifun starfsfólks af BYKO sem vinnustað.
Mikið hefur verið unnið í átt að þeirri framtíðarsýn á árinu en ljóst er að um langtímaverkefni er að ræða ef vel skal takast. Lykillinn að því að fá gott starfsfólk til starfa er að hafa gott orðsport, sterka ímynd og vinnustað sem starfsfólk mælir með. Framtíðarsýn okkar vinnur að því markmiði.
Líkt og fyrra ár þá lituðust mannauðsmál af Covid-19 fyrri hluta ársins. Áhersla var lögð á að upplýsa starfsfólk um stöðuna hverju sinni ásamt því að hvetja starfsfólk til að huga að andlegri og líkamlegri líðan á tímum heimsfaraldurs. Innri smitrakning félagsins stuðlaði að því að róður félagsins á tímum heimsfaraldurs gekk vonum framar. Mannauðsstefna félagsins hefur verið til endurskoðunar á árinu og verður gefin út á árinu 2023.
Á árinu 2021 hóf félagið samstarf við Great Place to Work. Samstarfið felur í sér greiningu á BYKO sem vinnustað, bæði menningarlega og með vinnustaðagreiningu. Í greiningunni er lögð áhersla á þjá megin lykilkvarða, traust, vellíðan og helgun. Niðurstöður vinnustaðagreiningarinnar veittu BYKO viðurkenningu sem frábær vinnustaður og á lista yfir bestu vinnustaði á Íslandi og í Evrópu. Í niðurstöðum kemur fram að 70% starfsfólks ber traust til félagsins, helgun mældist 71% og vellíðan 66%. Félagið stefnir á að ná enn betri árangri á þeim lykilkvörðum á árinu 2023.
Jafnréttisvegferð
Á árinu 2021 voru lögð grunnskref að jafnréttisvegferð félagsins þar sem jafnlaunastefna og jafnréttisáætlun félagsins var tekin til endurskoðunar. Áður hefur félagið sett jafnrétti á oddinn með því að velja heimsmarkmið um jafnrétti sem eitt af sínum kjarnamarkmiðum.
Árið 2019 skrifaði BYKO undir jafnvægisvog FKA. Á árinu 2022 hlaut BYKO viðurkenningu jafnvægisvogarinnar annað árið í röð, fyrir árangur félagsins í að jafna hlut kvenna og karla í framkvæmdastjórn og stjórn félagsins.
BYKO hlaut jafnlaunavottun í febrúar 2020 og stóðst viðhaldsúttekt fyrir árin 2020, 2021 og endurvottunarúttekt 2022. Launamunur kynjanna náði ekki markmiði félagsins í síðustu greiningu. Launamunur heildarlauna mældist 6,4% konum í óhag og launamunur grunnlauna mældist 3,5% konum í óhag. Breytingar voru gerðar á starfsmatskerfi félagsins á árinu sem hefur þau áhrif að launamunur hækkar tímabundið þar sem lögð var áhersla á að sníða kerfið ekki að núverandi launum heldur störfunum sem greitt er fyrir. Við höldum þó ótrauð áfram að ná markmiði okkar um innan við 1% launamun.
Fræðsla og þjálfun starfsfólks
BYKO skólinn sem var stofnaður í lok árs 2019 hefur náð að festa sig í sessi og var hann haldinn þrisvar sinnum á árinu 2022. Áhuginn á skólanum hefur verið mikill og hafa margir eldri starfsmenn sýnt skólanum áhuga og hafa óskað eftir að fá setjast á skólabekkinn. Skólinn er hugsaður sem fræðsla fyrir nýtt starfsfólk þar sem þeir fá kynningu á flestu sem tengist BYKO s.s. gildi, sögu BYKO og hlutverk deilda. Í þessi þrjú skipti á árinu 2022 hafa 39 einstaklingar setið skólann.
Áfram var unnið að því að færa fræðslumál á rafrænt form og framleiða efni innanhúss. Á árinu var tekið í gagnið rafrænt fræðslukerfi. Með því komum við betur til móts við þarfir starfsfólks um fjölbreytta fræðslu sem er þeim aðgengileg þegar þeim hentar. Einnig útbúið námslínur fyrir mismunandi störf og þar með ná betur að aðlaga nám að þörfum hvers og eins. Lögð er áhersla á að efnið á fræðsluvef gagnist starfsfólki bæði í vinnu og einkalífi.
Á árinu hóf félagið samstarfsverkefni með Fræðslumiðstöð atvinnulífsins og Mímir símenntun varðandi raunfærnimat. Verkefnið gerir starfsfólki BYKO kleift að fá útgefið fagbréf (30 framhaldsskólaeiningar) fyrir þá þekkingu og reynslu sem þau hafa aflað sér í vinnu. Innri úttektaraðilar (starfsfólk BYKO) sér um framkvæmd raunfærnismat í samstarfi við Mímir og Verslunarskóla Íslands. Starfsfólki býðst að nýta einingarnar í námið verslun og þjónusta sem kennt er í Verslunarskóla Íslands
Líðan og heilsa starfsólks
Á árinu 2022 var höfðað til starfsfólks í meira mæli en áður að huga að andlegri og líkamlegri líðan ásamt því að benda á upplýsingar, tæki og tól sem gætu gagnast þeim á þeirri vegferð.
BYKO lét líka framkvæma samfélagslegt áhættumat í lok árs 2022. Öllu starfsfólki bauðst að taka þátt í könnuninni og var svarhlutfallið 50%. Meðal annars voru mældar sex lykilspurningar á kvarðanum 1-5. Starfsánægja (3,9), ánægja með næsta stjórnanda (4,1), jafnvægi milli vinnu og einkalífs (3,7) og sveigjanleiki í starfi (3,8) mældist á starfhæfu bili en nauðsynleg fræðsla (3,3) og streita í starfi (2,8) á aðgerðarbili. Í fylgnigreiningu kemur fram að heildaránægja og stjórnun hefur mest áhrif á hverju jákvætt starfsfólk svarar spurningum könnunarinnar. Í niðurstöðum könnunarinnar kemur fram að tilfellum eineltis hefur fækkað um 1% frá fyrra ári, tilfellum kynferðislegrar áreitni fækkað um 2%, tilfellum kynbundnar áreitni fækkað um 4% og tilfellum ofbeldis fækkað um 3%.
Félagið studdi starfsfólk sitt til að stuðla að bættri líðan og heilsu
Líkamsræktar styrkur
Flensusprauta
Heilsufarsskoðun
Aðgengi að trúnaðarlækni
Velferðarþjónusta
Velferðarstyrkur
Öryggi og vinnuvernd
Öryggis- og eftirlitsdeild BYKO sér um málefni vinnuverndar hjá BYKO og starfa þriggja manna öryggisnefndir á öllum starfsstöðvum fyrirtækisins. Nefndirnar eru sjö talsins og í þeim er öryggistrúnaðarmaður starfsfólks (kosinn af starfsfólki), stjórnandi á starfsstöð (öryggisvörður) og öryggisstjóri BYKO eða annar meðlimur öryggis- og eftirlitsdeildar.
Vörutalningar
Starfskona er í öryggis- og eftirlitsdeild, hennar hlutverk er að stýra vörutalningum félagsins og heyrir hún undir öryggisstjóra.
Sítalningar voru innleiddar hjá BYKO á árinu 2021 og hafa gengið afar vel, þróun og innleiðing tókst líkt og stefnt var að og nú eru 2 heil sítalningarár að baki og 85% starfseminnar þegar komin í sítalningarmódelið. Staðföst trú okkar er að sítalningar (stöðugar daglegar vörutalningar) gefi besta mynd af raunstöðu birgða og rýrnun hjá félaginu heilt yfir og gefi færi á snörum viðbrögðum við óvæntum aðstæðum sem geti bætt flæði varnings og aukið hagnað félagsins. Undir vörutalningarstjóra er svo talningarfólk hverrar deildar.
Birgðaeftirlit
Í hópi öryggis-og eftirlitsdeildar er starfsmaður sem hefur að aðalstarfi birgðaeftirlit. Hlutverk hans er að setja upp ferla, teikna upp skynsamlegasta flæði varnings í gegnum starfsstöðvar BYKO, innleiða samræmda ferla og styðja við þau svið sem hafa með innkaup og vörustýringu að gera. Markvissar daglegar úttektir á birgðastöðu hjálpa til við birgðastýringu og eflir pöntunarferli okkar og innkaup og tryggir þannig bæði einstaklingum og stærri viðskiptavinum stöðugt flæði hráefna og varnings í Íslenska byggingamarkaðinn. Þá er í hópi öryggis- og eftirlitsdeildar starfsmaður sem sinnir öryggisgæslu í verslun okkar í Breidd og sinnir einnig fjölbreyttum rýrnunareftirlits og vinnuverndarstörfum samhliða því starfi. Réttleiki birgða, samræming innleiðinga og ferla. Í lok árs tók öryggis- og eftirlitsdeild við verkefnastýringu með öllum lagerstjórum og vörumóttöku BYKO heilt yfir alla starfsemina. Við væntum þess að innleiðingar ferla og breytingar sem gerðar eru í tengslum við tækniframfarir sérstaklega muni ganga mun betur og hraðar fyrir sig með þessari breytingu. Hópavinna er þegar hafinn og hópurinn orðin vel samstilltur fyrir komandi misseri og allir á sömu stefnu í þeirri vinnu. Sítalningarstjóri og birgðastjóri sjá um daglegt utanumhald með verkefnum þessa hóps en er stýrt af og á ábyrgð öryggisstjóra félagsins.
Áhættumat og hætta á spillingu
BYKO gerir úttektir á helstu áhættuatriðum í rekstri fyrirtækisins á sex mánaða fresti. Helstu áhættuþættir sem hafa verið greindir í þessum úttektum eru misnotkun afsláttar í sölukerfi, misferli starfsmanna, aðgangur óviðkomandi að lagersvæðum og svikatilraunir í gegnum tölvupóst og netsamskipti.
Fyrirtækið leggur áherslu á að minnka möguleg misferli á ýmsan máta. Öryggismyndavélum hefur verið komið upp á öllum starfsstöðvum þar sem slíkt er heimilt út frá persónuverndarsjónarmiðum. Stjórnendur, næstráðendur og lykilstarfsmenn hafa fengið fræðslu um verklagsreglur gegn spillingu. Fjórir birgjar hafa verið í samstarfi við BYKO til að greina mögulega áhættu á svikastarfsemi auk þess sem hluti verktaka sem annast störf á athafnasvæði BYKO hafa fengið fræðslu varðandi áhættu á spillingu.
Tölfræði ársins 2022
Á árinu komu 994 mál á borð öryggis- og eftirlitsdeildar. Stærsti hluti þessara mála eru tengd þjófnaði viðskiptavina eða 71% og um 24% eru öryggisatvik og óhöpp. Sum þessara öryggisatvika eru BYKO óviðkomandi og má þar t.d. nefna árekstra og önnur sambærileg atvik á athafnasvæðum BYKO. Engum viðskiptasamningi var sagt upp á árinu vegna atvika sem upp komu. Níu starfsmenn fengu áminningu eða uppsögn vegna atvika á árinu.
Starfsmannafélagið Kvistur
Eftir aðalfund vorið 2022 tók ný stjórn alfarið við starfsmannafélagi BYKO. Að sumri var haldin nafnasamkeppni meðal starfsfólks um nýtt nafn á félaginu og hlaut nafnið Kvistur flest atkvæði og gengur félagið því undir nafninu Kvistur í dag. Félagið fékk í kjölfarið nýtt merki.
Tilgangur félagsins er að standa fyrir skemmtunum og ýta undir félagsstarf meðal starfsfólks BYKO og stuðla þannig að samheldni og ánægju þvert á deildir, svið og starfsstöðvar.
